聖誕假期

26號參加大航假期既＜雲呢拿五虎癲狂聖誕夜旅行團＞，主要都係想 relex 下，團費 $559+小費$100。 一大清早８點就要到羅湖口岸集合，嘩！這間旅行社生意好好呀！成個廣場都幾乎係這間社既團，可能價錢平宜之固呀。 第一站係：威遠炮台，由深圳出發要一個多小時。 站係炮台可以睇到虎門大橋 虎門大橋位於中國廣東省珠江三角洲中部，距廣州約42公里。虎門大橋跨越珠江出海口的虎門水道和蒲州水道，東連東莞市虎門鎮，西通廣州市南沙區。虎門大橋是珠江三角洲高速公路網的重要組成部分，是連接京珠高速公路和廣深高速公路的重要交通樞紐，是溝通珠江出海口兩岸的粵東和粵西、深圳與珠海兩個經濟特區、香港與澳門兩個特別行政區的大型跨江懸索橋。 資料來自維基百科 ＝＝＝＝＝＝＝＝＝＝＝＝＝ 之後係午餐＜東升脆肉鯇魚宴＞，脆肉鯇係“中山十大金牌名菜”之一，多種的泡制方法，清蒸、椒鹽、紅燜、煎焗、雙飛起片火鍋等，果然好正呀！ 食飽後，第二站係草莓樂園(任摘任食)，不過，今次摘既只係橙，我最多只可以食一個，貪心之下摘左一個放入手袋拿回家。 回程返到中山石岐既＜金鑽酒店＞，我住果間係公寓式房間，有個 open 既廚房連大廳，獨立睡房，洗手間連沖涼房 <有可以躺下享受浸浴既浴缸，有玻璃間隔既企浴房，任君選擇 >，重有一個我夢未以求既大露台，嘩！我鐘意呀！好想擁有一間這類型既 apartment 呀！ 晚餐到就近既香格里拉大酒店食飯兼睇＜雲呢拿五虎＞表演，＜雲呢拿五虎：喬寶寶，姜皓文，布偉傑，王俊棠，魯振順＞。 全晚表演，全場 D 人都好 high ，好多人都跟著歌聲跳舞，有觀眾派利是比這班五虎，就其是魯振順，當佢扮羅文唱歌走到觀眾席時，嘩！佢收利是收到手軟。 我深深咁睇會到，甚解咁多半紅不黑既藝人可以住洋樓養番狗，原來只要你識得唱歌＜唱得唔好唔緊要＞，只要你知道甚樣去氹人開心，咁係＜密食當三番＞之下，你搵既錢真係可能拍得住果Ｄ天皇。無相睇＜因為部電話係室內影既相唔清楚＞。 就係咁至 10 點完結，帶著愉快心情返酒店，祖國電視台係收唔到香港既電視台時事新聞節目既，只可收到兒童和運動方面既節目，想知道香港新聞就要返香港先可以睇到啦，現在既中國已成為有影響力的大國，但新聞封銷都未解放，真係可悲，無咩岩睇下，只好去睡覺。 第二日，一早 7 點起床，習慣起床要飲溫水，但房內只有凍水，只好走到餐廳食自助早餐，一坐下先飲一大杯溫水，因為不能夠立刻食野，只好呆呆坐下，那些待應用好奇眼光望著我........。 因為 11 點先至集合，所以早餐後走去酒店內蒸氣浴室，原來日間少人到，所以浴室連蒸氣室關了電，因為我到，所以為我開曬所有電源，真係有Ｄ唔好意思，係咪好唔環保呀？有點自責。 下一站係＜全新沙溪隆都傢俱博覽中心＞，這處是紅木傢俬展覽中心，可以定做傢俬。 世界最大仿紅木龍椅「世紀寶座」，座底寬十五米，座背最高處達十三米，足有四層樓高。寶座通體大紅，其中用各種顏色描繪出祥雲，巨龍等皇家圖案。 這佛像我好喜歡，因為佢笑得好可愛。 中午餐係＜暖胃豬肚雞乳鴿宴＞，豬肚湯好飲呀！乳鴿係真正既小小乳鴿，好味呀！ 之要坐長途車返深圳，因為落雨關係，所以車程由 1.5 小時變左 2.5 小時，最後一站又係大家最喜愛既＜沃爾瑪超級市場＞自由購物，這處既價錢比其他超市平宜，見到有聲稱無農藥既疏菜，不知可信與否之下，我買左一盒白菜，２條黑糯玉米，一盒小玉米加上一大盒棗泥核桃蛋糕，一共＄38 旅途間發生小插曲，一班亞太話熱要求開大冷氣，另一班亞太話凍要求小冷氣，就係咁，大家竟然用粗言穢語互罵，真係十足十似我班上時有發生既情況，不過，我既學生比較斯文無講粗口，最多只會面黑。 回到家 8 點，我既潔癖又發作，立刻沖涼洗衫。 咁樣就過左一個 holiday。